Камсыздандыруу компаниясы: "Маршруттук таксилерди камсыздандыруудан өткүлө деп эскертүү кеч берилди деген калп"

Маршруттук таксилер камсыздандыруудан өтсүн деген мыйзам 2010-жылы күчүнө кирген. Бул тууралуу SUPER.KG порталына "Кыргызинстрах" камсыздандыруу компаниясынын башчысынын орун басары Бакыт Иманбеков билдирди.

Анын айтымында, маршруттук таксилерди камсыздандыруудан өткүлө деп эскертүү кеч берилди деген калп.

"Маршруттук таксилер камсыздандыруудан өтсүн деген мыйзам 2010-жылы күчүнө кирген. Бирок 2010-жылдан бери иштеген эмес. Маршруттук таксилердин айдоочуларын "камсыздандыруу боюнча эскертүү 30-мартта берилди" дегени калп. Анткени биз жылдын башында эле Жүргүнчү ташуучулар ассоциациясы менен жолугуп сүйлөшкөнбүз. Марттын башында эле МАИ кызматкерлери кичи автобустардын башчыларын чакырып, "мыйзам күчүнө кирет, камсыздандыруудан өткүлө, болбосо айыпка тартыласыңар" деп эскертүү берген. Учурда шаардагы маршруттук таксилер камсыздандыруудан өтүү үчүн 2458 сом төлөш керек, ошондо күнүнө 10 сомдон болуп калат", - дейт Бакыт Иманбеков.

Айта кетсек, бүгүн, 2-апрелде Бишкектеги маршруттук таксилердин айдоочулары иш ташташкан. Алар мунун себебин жумушка атайын форма кийүү талабы, камсыздандыруу компаниясын киргизүү, жол эрежесин бузуу боюнча айыптар эки эсеге өскөнү менен түшүндүргөн.