Депутат аймактарга барганда эмнеден уялып жатканын айтты

Жогорку Кеңештеги Бюджет жана финансы комитетинин жыйынында депутаттар өкмөткө курулушу бүтпөй жаткан мектептерди бүткөрүүнү сунушташты.

Депутат Мурадыл Мадеминовдун айтымында, жаңы мектеп салууга 3 жылга мораторий кабыл алыныш керек.

"V чакырылыштын депутаттарынын ортосунда мектеп салуу боюнча жарышуу болуп кеткен эле. Ошол учурда курулуш тизмесине өтө көп мектеп кирип кеткен экен, азыр бүтпөй жатат. Аймактарга барганда элден уялып жатабыз. Көпчүлүгүнүн дубалы тургузулган бойдон калса, айрымдарынын чатыры жабылган абалда турат. Ошондуктан жаңы мектеп салууга мораторий кабыл алып, ошол мектептерди бүткөрүп алуу керек", - деди Мадеминов.

Анын мындай пикирин башка депутаттар да колдоого алышты. Ал эми өкмөт өкүлдөрү 2018-жылдагы курулуш тармагына мамлекеттен 2 миллиард 900 миллион сом бөлүнгөнүн, ага өзгөчө кырдаалдар учурунда жабыркаган имараттардын курулуштары, курулушу 70 пайыздан ашык даяр болгон мектептер киргизилгенин билдиришти. Каржы министри Адылбек Касымалиев курулуш иштери үчүн дагы кошумча акча изделе турганын баса белгиледи.