Тони Фергюсон менен Хабиб Нурмагомедовдун беттеши 4-ирет жылдырылды. Эми чемпиондук кур үчүн Нурмагомедов менен Макс Холлоуэй беттешет

Эрежесиз уруш боюнча UFC уюмунун жеңил салмак чениндеги чемпиондук кур үчүн Хабиб Нурмагомедов менен Тони Фергюсондун беттеши 4-ирет жылдырылды. Бул тууралуу чет элдик басылмалар жазышууда.

Маалыматка ылайык, 7-апрелде орун ала турган "UFC 223" мелдешинин негизги беттеши Хабиб Нурмагомедов менен Тони Фергюсондун ортосунда болмок. Анда мушкерлер жеңил салмак чениндеги чемпиондук кур үчүн беттешмек. Бирок Тони Фергюсондун жаракат алып калганына байланыштуу чемпиондук кур үчүн Хабиб Нурмагомедов менен Макс Холлоуэй беттешмекчи.

Айта кетсек, Макс Холлоуэй UFC'нин жарым жеңил салмак чениндеги чемпиондук курдун ээси. Ал профессионалдык карьерасында 22 беттеш өткөрүп, 19 беттеште жеңишке жетип, 3 беттеште жеңилүү ызасын тарткан.

Ал эми Хабиб Нурмагомедов профессионалдык карьерасында 25 беттеш өткөрүп, бардыгында жеңишке жеткен.

Эске салсак, Хабиб Нурмагомедов менен Тони Фергюсондун беттеши 4-жолу жылдырылууда. Буга чейин мушкерлердин беттеши 2015-жылы, 2016-жылы жана 2017-жылы уюштурулган, бирок анда Нурмагомедов же Фергюсон жаракат алгандан улам беттеш өткөрүлгөн эмес.