Бишкектеги маршруттук таксилердин иш таштаганы Жогорку Кеңешке жетти

Бүгүн, 3-апрелде Жогорку Кеңештин тармактык комитетинин жыйынында Бишкекте маршруттук таксилердин айдоочуларынын иш таштаганы талкууланып жатат.

Жол кыймылынын коопсуздугун көзөмөлдөө боюнча башкы башкармалыгынын башчысы Канат Жумагазиев комитет мүчөлөрүнө маршруттук таксилердин айдоочулары 2-апрелде эмне үчүн ишке чыкпай койгонун түшүндүрүп берди. "Айдоочулар камсыздандырууну, бирдиктүү форма кийүүнү четке кагып, каалаган жерден токтоого уруксат берүүнү, жол киренин акысын 15 сомго жогорулатууну жана жүргүнчүлөрдү каалаган жерден өтүүсүнө тыюу салуу талаптарын коюшкан. Бирок мыйзам баарына бирдей болуш керек", - деди Жумагазиев.

Анын маалыматына караганда, 2017-жылы эл ташыган маршруттук таксилердин катышуусунда Бишкекте жалпы 600дөн ашык жол кырсыгы катталса, анын кесепетинен 1100 адам жаракат алып, 60тан ашык адам каза болгон.