ЖЭБге кеткен миллиондорду иликтеген депутаттык комиссиянын жыйыны үзгүлтүккө учурады

Бүгүн, 3-апрелде Бишкек жылуулук электр борборунун 386 миллион долларлык курулушун иликтеген депутаттык комиссиясынын жыйыны үзгүлтүккө учурады. Буга Кытайга барып, ТВЕА компаниясы менен таанышып келген депутаттардын бүгүнкү жыйынга чакырылып, бирок келбегени себеп болду. Алар: Чыныбай Турсунбеков, Азамат Арапбаев, Мурадыл Мадеминов жана Исхак Пирматов.

Кытайга барып келген Осмонбек Артыкбаев гана жыйынга катышты. Ал 2013-жылы ТВЕАнын ишмердүүлүгү менен таанышып келүү үчүн Кытайга эки депутаттык делегация барганын айтты.

Депутаттык комиссиянын мүчөсү Мыктыбек Абдылдаев жыйынга чакырылган депутаттардын келбей калышына нааразы болду.

“Чакырылган кесиптештерибиздин келбей калышы өтө өкүнүчтүү. Биз ЖЭБдеги кырдаал боюнча аткаруу бийлигиндеги адамдарды гана укпастан өз кесиптештерибиздин да калыс сөздөрүн угуп коюуну туура көргөн болчубуз. Ошондуктан алардын да оюн угуп, андан кийин жыйынтыктоо керек деп ойлогонбуз”, - деди Абдылдаев.

Комиссия төрагасы Улан Примов башка күнү комиссиянын кезексиз жыйынын өткөрүүнү сунуштады. “Ар кандай себептерден улам келе алышкан жок. Бирок комиссиянын корутундусу даярдалып жатат. Эртең же дагы башка күнү кезексиз жыйынга чогулуп, алардын оюн угуп, чечим кабыл алабыз”, - деди Примов.

Комиссиянын мүчөсү Алмазбек Токторов эртең парламенттин жалпы жыйынында бул маселени кароону сунуштады. Примов бул сунушту эртеңки жыйында көтөрө турганын айтты.

Эске салсак, 26-январда Бишкек ЖЭБинде авария болуп, шаардагы үйлөргө берилген жылуулук 7 күнгө төмөндөгөн. 386 миллион долларлык ЖЭБдин курулушу, ЖЭБдеги авария, өкмөттүн күз-кыш мезгилине даярдыгын иликтеп чыгуу боюнча парламентте депутаттык комиссия түзүлгөн.

Депутаттык комиссиянын курамына төмөнкүлөр кирет:

"Өнүгүү-Прогресс" фракциясынан - Исхак Масалиев;

КСДП фракциясынан - Төрөбай Зулпукаров, Данияр Аттокуров, Аида Касымалиева, Улан Примов, Аалы Карашев;

"Бир Бол" фракциясынан - Мыктыбек Абдылдаев;

"Ата Мекен" фракциясынан - Сайдулла Нышанов;

"Республика-Ата Журт" фракциясынан - Айбек Алтынбеков, Акылбек Жамангулов, Умбеталы Кыдыралиев;

"Кыргызстан" фракциясынан - Исланбек Сарсейитов, Алмазбек Токторов.