Нурлан Өмүркул уулу: "2 даанасы 640 доллар деп көрсөтүлгөн чемодандар кычкачтан өзүнчө эсептелип 105 доллардан келген"

"Улуттук энергетикалык холдинг компаниясынын жетекчиси Айбек Калиев көрсөтүп жаткан чемодандагы шаймандар тизмеде өзүнчө эсептелип, 105 доллардан келген", - деп бүгүн, 3-апрелде SUPER.KG порталына ЖЭБдин мурунку жетекчиси Нурлан Өмүркул уулу билдирди.

"Булар кайра документтерге өзгөртүү киргизип, жаңы документти түзүп чыгышты. Анда кычкачты, 2 чемодан ачкычтардын топтомун жана резина лентасын бириктирип бир баа кылып көрсөтүшкөн. Тизмеде кычкач деген жок, анын ордуна кечээ көрсөткөн 2 чемодан ачкычтардын топтому жана резина лентасы деп жазылып жүрөт.

ЖЭБдеги аварияны иликтеген комиссиянын жыйынтыгында, мен эски акты менен жаңы кайра түзүп чыгышкан актынын айырмачылыгын көрсөтөм", - деди Өмүркул уулу.

Эске салсак, кечээ, 2-апрелде Бишкек ЖЭБдеги авариянын кесепеттерин иликтеген депутаттык комиссиянын жыйынында энергетикалык холдинг компаниясынын жетекчиси Айбек Калиев "600 долларлык кычкач" боюнча түшүндүрмө берген. Анда кычкачтын баасы деп башка шаймандарга коюлган баа көрсөтүлүп калганын, кычкач деп көрсөтүлгөн чемодандын ичинде 18 шайман жана өзүнчө импорттолуп келген резина лентасы болгонун айткан.