УКМК: "Электр станциялары" ишканасынын модернизациялоо тобунун жетекчиси Темирлан Бримкулов кармалды"

"Электр станциялары" ишканасынын модернизациялоо тобунун жетекчиси Темирлан Бримкулов УКМК тарабынан 3-апрелде кармалды. Бул тууралуу SUPER.KG порталына УКМКнын басма сөз кызматы билдирди.

Маалыматка караганда, жетекчи Кылмыш-жаза кодексинин 221-беренеси (Коммерциялык же башка уюмдардын кызматчыларынын ыйгарым укуктарын кыянаттык менен пайдаланышы) менен айыпталууда.

"Аталган ишкананын модернизация тобунун жетекчиси Темирлан Бримкуловго УКМК 2-апрелде кылмыш ишин козгогон. 3-апрель күнү Бримкулов кармалып, УКМКнын убактылуу кармоочу жайына киргизилди. Учурда тергөө иштери жүргүзүлүүдө. Ал ЖЭБдеги өндүрүштүк кырсык боюнча кармалды", - дейт басма сөз катчы.

Буга чейин "Электр станциялары" ишканасынын башкы директору Узак Кыдырбаев УКМК тарабынан кармалган. Ошондой эле ишкананын техникалык директору Алмаз Жусупбеков, ишкананын жетекчисинин мурдагы биринчи орун басары Бердибек Боркоев да кармалгандыгы маалымдалган.

Ал эми 30-январда Башкы прокуратура Бишкек жылуулук электр борборундагы өндүрүштүк кырсык боюнча кылмыш ишин козгогон. Бул боюнча Кылмыш-жаза кодексинин 316-беренеси (шалаакылык) менен кылмыш иши козголгону маалымдалган.