Баткенде Кыргыз-Тажик чек арасындагы жаңжалдан үч адам жабыркаган

Баткен районундагы Үч-Дөбө айыл аймагында болгон Кыргыз-Тажик чек арасындагы жаңжалдан үч Кыргыз жараны жаракат алган. Бул тууралуу SUPER.KG порталына Өкмөттүн Баткен облусундагы ыйгарым укуктуу өкүлүнүн басма сөз катчысы Чолпон Бердикулова билдирди.

"3-апрелде Баткен облустук биргелешкен ооруканасына эки жаран башынан жаракат алып жаткырылган. Алар Самаркандек айылынын тургуну А.Н. жана Миң-Булак айылынын 39 жаштагы тургуну Б.А. Учурда жабыркагандар дарыгерлердин көзөмөлүндө. Дагы бир Үч-Дөбө айылынын А.А. аттуу тургуну дарыгерлер тарабынан көргөзүлгөн биринчи жардамдан кийин үйүнө кеткен. Бүгүн эртең менен Өкмөттүн облустагы ыйгарым укуктуу өкүлү Абдиш Халмурзаев ооруканага барып, жарандардын абалы менен таанышып келди. Учурда жабыркагандардын абалы жакшы", - дейт басма сөз кызматы.

Эске салсак, 3-апрелде Баткен районунун Үч-Дөбө айыл аймагында Тажик жана Кыргыз жарандарынын ортосунда жаңжал чыккан. Бул боюнча айылдын тургуну окуя тууралуу талашка түшкөн жер кыргыздарга тийиштүү болгонун айткан.