Жалал-Абад шаарынан эми япон достугунун символун көрүүгө болот

Жалал-Абад шаарындагы "Жеңиш" эс алуу багында жана Ленин борбордук көчөсүнүн четине япон сакурасынын көчөттөрү отургузулду. Бул тууралуу бүгүн, 5-апрелде SUPER.KG порталына Жалал-Абад шаардык Көрктөндүрүү жана жашылдандыруу чарбасынын башчысы Алынбек Оморкулов билдирди.

"Шаардын аймагындагы эл көп баруучу эс алуу бактарына жана борбордук көчөнүн четтерине 100 даана япон сакурасы отургузулду. Көчөттөр тендер аркылуу сатып алынды. Тендерди утуп алган жеке ишкана Өзбекстандан 1 көчөттү 180 сомдон сатып алып келди. Негизинен өсүмдүктүн бул түрү сууну көп талап кылат. Учурда отургузулган көчөттөрдүн 80 пайызын толук кандуу жетилишин камсыздоого аракет кылып жатабыз. Көчөттөр өнгөндөн 1 жылдан кийин гүлдөй баштайт", - деп билдирди жетекчи.

Ошондой эле Алынбек Оморкулов япон сакурасынын көчөттөрү Жалал-Абад шаарында алгачкы жолу отургузулганын кошумчалады.

Айта кетсек, 2017-жылы япон-кыргыз дипломатиясынын 25 жылдыгына арналып Бишкек шаарында сакуранын көчөттөрү отургузулган. Ошондой эле япон багы Ысык-Көл облусуна да 2017-жылы отургузулган.

Сакура дарагы Япония өлкөсүнүн маданиятынын жана достугунун символу болуп саналат.