Арча-Бешикте ур-токмоктон каза болгон келиндин өлүмүнө шектелип аны менен жарандык никеде жашаган адам кармалды

Арча-Бешик конушунда ур-токмоктон каза болгон келиндин өлүмүнө шектелип аны менен чогуу жашаган 25 жаштагы жаран кармалды. Бул тууралуу Бишкек ШИИББинин басма сөз кызматынан билдирди.

Маалыматка ылайык, каза болгон келиндин 3 кичинекей баласы болгон.

"Бул окуя боюнча кылмышка шектүү катары 25 жаштагы М.М. аттуу жаран кармалды. Окуя болгон күнү шектүү досу менен маркумдун үйүнө келип спирт ичимдиктерин ичишкен. Андан соң маркум келин менен шектүүнүн ортосунда чыр чыгып, шектүү аны сабап салган. Жабырлануучу алган жаракаттарынан улам окуя болгон жерден каза болгон", - деп билдирет басма сөз кызматы.

Бул окуя боюнча Кылмыш-жаза кодексинин 97-беренеси (адам өлтүрүү) менен кылмыш иши козголду. Учурда шектүү убактылуу кармоочу жайга киргизилип, тергөө иштери башталды.

Эске салсак, 5-апрель күнү Бишкек шаарындагы Арча-Бешик конушунан 31 жаштагы келиндин жансыз денеси табылган.