Акыйкатчы: "Чет өлкөдө каза болгон Кыргыз жарандарынын сөөгү мекенине бекер алынып келе баштайт"

Чет өлкөдө каза болгон Кыргыз жарандарынын сөөгү мекенине бекер алынып келе баштайт. Бул тууралуу бүгүн, 6-апрелде "Эмгек мигранттарынын укуктары" аталышындагы тегерек столдо акыйкатчы Кубат Оторбаев билдирди.

Анын айтымында, Акыйкатчы институту "Жүк 200дү" жеткирүүдөгү көйгөйлөр менен өкмөткө кайрылып, өкмөт компенсация бекитип берди. Буга чейин чет өлкөдө иштеп жүрүп каза болгон Кыргыз жарандарынын сөөгүн мекенине жеткирүүгө кеткен каражатты ошол жакта эмгектенип жүргөн мекендештер чогултуп берчү.

"Кыргыз жарандарынын 57 пайызы Орусияга иш табуу үчүн кетишет. Алардын 34 пайызы курулуш иштеринде, 26 пайызы соода тармагында, 24 пайызы тейлөө кызматтарында эмгектенишет. Орто эсеп менен эмгек мигранттарынын жумуш убактысы 8 же 10 саатты түзөт. Мигранттардын көбү эмгек келишими жок иштейт. Бүгүнкү күндө Москвада уюмдар менен ишканалар биздин 2084 жаранга эмгек акы төлөгөн эмес, башкача айтканда, 34 миллион 550 рубль карыз. Учурда мигрант мекендештерибиздин көйгөйү - бул эмгек келишимин жумуш берүүчү менен өз убагында түзө албай жатканында", - деп билдирет акыйкатчы.