"ЭЛДИК КАБАРга" жооп: "Сүйүнчү пул алуу үчүн документ тапшырган жарандарга бир айдын ичинде акча которулуп жатат" дейт социалдык өнүгүү башкармалыгы

Сүйүнчү пул алуу үчүн тиешелүү документтерди тапшырган жарандарга бир ай ичинде акча которулуп жатат. Бул тууралуу SUPER.KG порталына Аксы районунун Социалдык өнүгүү башкармалыгынын башчысы Иличбек Үсөнов билдирди.

"Азыркы тапта сүйүнчү пул берүү жаңы башталгандыгына байланыштуу ар кандай маселелер жаралбай койгон жок. Бирок жарандардын ой-пикирин, сунуштарын угуп, улам сүйүнчү пул берүү жолдору жакшыртылып жатат. Азыркы тапта тиешелүү документтерди тапшырган жарандарга акча 25 күндүн ичинде атайын ачылган эсебине которулуп жатат", - дейт башчы.

Ошондой эле Үсөнов кээ бир учурларда жарандардын эсебине акча которулганы тууралуу SMS билдирүү барбай калып жатканын билдирип, алар өз эсебин банктан же банкоматтан текшерип туруусу керек экенин кошумчалады.

Эскерте кетсек, "Соңку кабар" бөлүмүнүн "ЭЛДИК КАБАР" рубрикасына "2 айдан бери жаңы төрөлгөн ымыркайыма сүйүнчү пул ала албай жатам" деген билдирүүсүн окурман WhatsАpp аркылуу жөнөткөн.