Чемпиондор Лигасы: "Ливерпуль" чейрек финалдык беттештердин жыйынтыгында "Манчестер Ситини" 5:1 эсебинде утуп, жарым финалга өттү

11-апрелге караган түнү Чемпиондор Лигасынын чейрек финалдык жооптук беттештери орун алды. Анда Манчестер шаарында жергиликтүү "Манчестер Сити" "Ливерпуль" футболдук клубу менен кездешти.

"Этихад" стадионунда орун алган беттеш коноктордун жеңиши менен 1:2 эсебинде жыйынтыкталды. Пеп Гвардиоланын шакирттери алгачкы мүнөттөрдө эле чабуулду аягына чейин жеткирип, эсеп санын ачты. "Ситинин" оюнчусу Габриэл Жезус 2-мүнөттө таамай болуп, эсепти 1:0 кылды. Манчестердик команда атаандашына чабуул жасоого мүмкүнчүлүк бербей, өзүнүн курч чабуулдарын уюштуруп жатты. Бирок "Ливерпулдун" коргонуусу мыкты болуп, "Сити" эсепти өзгөртө алган жок. 55-мүнөттө Мохамед Салах эсепти 1:1 кылып кетсе, 77-мүнөттө Роберто Фирмино атаандашынын катасынан пайдаланып, алыскы бурчка узатылган таамай соккусу менен эсепти 1:2 кыла калды.

Муну менен эки беттештин жыйынтыгында, "Ливерпуль" 5:1 эсеби менен "Ситини" утуп, Чемпиондор Лигасынын жарым финалына аттанды.