Өмүрбек Текебаев отурган камерадан видеокөзөмөлдү алып салуу боюнча маселесин карап чыгуу тапшырылды

Премьер-министр Сапар Исаков экс-депутат Өмүрбек Текебаев отурган камерадан видеокөзөмөлдү алып салуу боюнча маселесин карап чыгууну Жаза аткаруу мамлекеттик кызматынын төрагасы Таалайбек Жапаровго тапшырды. Бул тууралуу бүгүн, 11-апрелде өкмөттүн басма сөз кызматы билдирди.

Маалыматка ылайык, аталган маселени кечээ, 10-апрелде Жогорку Кеңештин комитет жыйынында "Ата Мекен" фракциясынын лидери Алмамбет Шыкмаматов көтөргөн. "Таалайбек Жапаров бул маселе карала турганын билдирди. Ошону менен катар эле Жапаров мыйзам боюнча видеокөзөмөл адамдын коопсуздугу үчүн орнотула турганын кошумчалаган", - деп жазылат маалыматта.

Белгилей кетсек, 2017-жылы 16-августта Бишкек шаарынын Биринчи Май райондук соту Өмүрбек Текебаевди жана мурдагы элчи Дүйшөнкул Чотоновду ар бирин 8 жылга эркинен ажыраткан. 2-октябрда Бишкек шаардык соту, 21-ноябрда Жогорку Сот Текебаев менен Чотоновго карата Биринчи Май райондук сотунун өкүмүн күчүндө калтырган.

Текебаев отурган камерага видеокөзөмөл ушул жылдын январь айында орнотулган.