Жанар Акаев: "Абакта жаткан саясатчылардын көпчүлүгү саясий мүнөздө соттолгон"

"Абакта жаткан саясатчылардын көпчүлүгү саясий мүнөздө соттолгон", - деп бүгүн, 11-апрелде депутат Жанар Акаев Жогорку Кеңеште соттолгон саясатчылардын жакындары менен болгон жолугушууда билдирди.

Анын айтымында, саясатчылардын буйруктун негизинде камалуусуна тиешеси бар адамдарды жөн гана жумуштан алып коюу туура эмес.

"Саясий буйрук аткарсак, камалат экенбиз" деп корко турган кылышыбыз керек. Азыр камалган саясатчылардын баары эле саясий мүнөздө соттолушту. Бул жерде Дастан Сарыгулов отурат. Бул кишини бийликти басып алууга аракет кылган деген негизде соттошту. Колунда таягы турат. Ак үйдүн 6 эшигин ачып коюп чакырсаң да, араң басып келет. Бул киши ушул абалы менен бийликти басып алып эмне кылат?

Сиздер саясий бандиттик режим менен күрөшүп жатасыздар. Эми азыр жаңы президентке үмүт оту жанды, ыраазы болуп жатабыз. Керек болсо, ал киши адилетсиз камалгандарды мунапыс берип абактан чыгарып жиберсе дагы ыраазы болобуз. Ошондуктан биз жакынкы күндөрү жооптуу кызмат ордуна келчү адамдардын талапкерлигин карайбыз", - деди Жанар Акаев.

Айта кетсек, депутаттар менен жолугушууда саясатчылар Өмүрбек Текебаевдин, Дүйшөн Чотоновдун, Канат Исаевдин, Садыр Жапаровдун, Максат Кунакуновдун, Бектур Асановдун, Кубанычбек Кадырбековдун, Эрнест Карыбековдун туугандары менен жактоочулары катышты. Мындан тышкары экс-президент Алмазбек Атамбаевге сотто утулган журналисттер Нарын Айып жана Дайырбек Орунбеков жыйынга келишти.