Аида Касымалиева мурдагы спикер Турсунбековдон "ТВЕА Кыргыз депутаттарын Кытайга чакырып, бирден планшет бергенби?" деп сурады

Бүгүн, 11-апрелде Жогорку Кеңештин депутаттарынан турган ЖЭБдеги өндүрүштүк кырсыктын себептерин иликтеген комиссиянын жыйыны болду. Анда мурдагы Жогорку Кеңештин төрагасы Чыныбай Турсунбеков жана ошол кезде өкмөт башында турган Жантөрө Сатыбалдиев маалымат берди.

Депутат Аида Касымалиева Чыныбай Турсунбековдон "ТВЕАнын чакыруусу менен барган депутаттар өлкөгө планшет көтөрүп келген" деп айтылган маалыматтардын чын-төгүнүнө кызыкты.

"Депутаттык топко ТВЕА бирден планшет берген деген сөздөр айтылууда. Ошол сөздүн чындыгы барбы? Эгер чын болсо, ал кандай планшеттер эле?" - деп суроо салды Касымалиева.

Чыныбай Турсунбеков расмий сапарларга барган учурда дайым эки тарап бири-бирине белек ыйгаруу салты болорун айтып, ал жактан эмне белек алганына токтолгон жок.

"Бардык иш сапарларга барганда биз белек алып барып, ал жактан белек алып келебиз. Ошол сыяктуу эле биз барганда сувенир жана башка алып барган белекти тапшырганбыз. Алар да өздөрүнүн деңгээлинде белектерди беришкен. Мен ага токтолбой эле койгонум оң", - деп жооп берди Турсунбеков.