"Алай" футболдук клубу АФК Кубогунун алкагында тажикстандык "Истиклол" менен беттешип, 1:0 эсебинде жеңилип калды

Бүгүн, 11-апрелде АФК Кубогунун тандап алуу оюндарынын 3-туру орун алды. Анда Тажикстандын Дүйшөмбү шаарында жергиликтүү "Истиклол" менен Оштун "Алай" футболдук клубдары кез келди.

Беттеш 1:0 эсеби менен "Истиклолдун" жеңиши менен жыйынтыкталды. Алгачкы таймда командалар гол киргизгенге үлгүргөн жок. 2-таймдын башталышында "Истиклолдун" оюнчусу Фатхулло Фатхуллоев таамай болуп, эсеп санын 1:0 кылды. 3-турдун алкагында "D" тайпасында тажикстандык "Алтын-Асыр" менен "Ахал" командалары 1:1 эсебинде тең чыгышты.

Муну менен тажикстандык "Истиклол" 7 упай топтоп турнирдик жадыбалдын башында жайгашса, 5 упайга ээ болгон "Алтын-Асыр" 2-орунду ээледи. 4 упайга ээ "Ахал" 3-орунду ээлесе, 4-орунда упайсыз "Алай" командасы жайгашты.

Эске салсак, Оштун "Алай" футболдук клубу буга чейин АФК Кубогунун тандап алуу оюндарынын алкагында 2 оюн өткөргөн. Анда 7-мартта 1-турдун алкагында "Алай" түркмөнстандык "Алтын-Асырга" 3:6 эсебинде жеңилсе, 13-мартта түркмөнстандык "Ахал" менен беттешип, 5:0 эсебинде жеңилип калган.