Чемпиондор Лигасы: Криштиану Роналдонун акыркы мүнөттө киргизген голу "Реал Мадридди" жарым финалга чыгарды

12-апрелге караган түнү Чемпиондор Лигасынын чейрек финалынын жооптук беттештери орун алды. Анда Мадрид шаарында италиялык "Ювентус" конокто испаниялык "Реал Мадрид" менен беттешти.

"Сантьяго Бернабеу" стадионунда орун алган беттеш 3:1 эсебинде "Реалдын" жеңиши менен аяктады. "Ювентус" бул беттеште укмуштудай оюн көрсөтүп, жарым финалга өтүп кете жаздады. Италиялык клубдун оюнчулары алгачкы мүнөттөрдөн атаандашынын коргоочуларынын айласын кетирип, 2-мүнөттө эле Марио Манжукичтин голу менен эсепти 1:0 кылды. 37-мүнөттө Марио Манжукич Стефан Лихштайнердин чыгарып берүүсүн ийгиликтүү жыйынтыктап, эсепти 2:0 кылды. Муну менен италиялык команда толугу менен өзүнө ишенип, көбүрөөк чабуул жасоого аракеттене баштады. Ал эми, Зинедин Зидандын шакирттери эсеп санын өзгөртүүгө шашылып, кооптуу чабуулдарды уюштуруп жатышты. Беттештин 67-мүнөтүндө Блез Матюиди Кейлор Навастын катачылыгынан пайдаланып эсепти 3:0 кылып кетти. Мындан кийин командаларга жеңишке жетиш үчүн 1 гана гол керек болчу. 90-мүнөттө Мехди Бенатиа өз айып аянтчасында Лукас Васкести жыгылтып, атаандашына пенальти аткарууга мүмкүнчүлүк берди. Калыстын мындай чечимине ачууланган Жанлуижи Буффон ага орой мамиле кылганы үчүн кызыл айып кагазын алып, оюн талаасын таштоого аргасыз болду. Пенальтини Криштиану Роналду мыкты аткарып командасына жеңиш алып келди.

Муну менен "Реал Мадрид" чейрек финалдын эки беттешинин жыйынтыгында "Ювентусту" 4:3 эсебинде утуп, Чемпиондор Лигасынын жарым финалына "Бавария", "Ливерпуль" жана "Рома" командалары менен бирге өттү.