Депутат Мамай айылында чек арачылардын огунан Кыргыз жараны каза болгон жер тилкесине өткөрмө пунктун орнотууну сунуштады

"Республика-Ата Журт" фракциясынан депутат Үмбөталы Кыдыралиев "Мамай айылында чек арачылардын огунан Кыргыз жараны каза болгон жер тилкесине тосмолорду тартуу керек" дейт. Бул тууралуу ал бүгүн, 12-апрелде Жогорку Кеңештин жыйынында билдирди.

Депутат Мамай айылы аркылуу өткөн Кыргыз-Өзбек чек ара тилкеси такталганы менен, зым тосмолор тартылган эместигин айтты.

"Ушул окуяны карап чыгуу боюнча тапшырма берүүңүздү суранам. 2018-жылы январь айында Ала-Бука районунда да ушуга окшогон окуя болгон. Бул биздин жарандардын тынчтыгы жана өмүрү үчүн маанилүү. Мамлекеттик чек ара кызматы ушул маселе боюнча тийишитүү маалыматтарды алып келсин.

Кандай себептер менен Кыргыз жаранына өз өлкөсүнүн аймагында жүргөн учурда ок чыгарылды? Эгер ал жердеги тилке такталган болсо, эмне үчүн бүгүнкү күнгө чейин тосмолор тартылган эмес? Балким ошол жерге чек ара өткөрмө пунктун орнотуу туура болот?" - деп сунуштады Кыдыралиев.