"ЭЛДИК КАБАРга" жооп: "Көлчүктү убактылуу шагыл менен толтуруп койдук" дейт Ош шаарынын жол башкармалыгынын жетекчиси

Ош шаарындагы Масалиев көчөсүндө жолду оңдоо иштери жүрүп жатканына байланыштуу тротуардагы көлчүктү шагыл менен убактылуу толтуруп койдук. Бул тууралуу SUPER.KG порталына Ош шаарынын жолдор башкармалыгынын жетекчиси Арзыбек Жунусов билдирди.

"Учурда Масалиев көчөсүндө жолду оңдоо иштери жүрүп жатат. Тротуардын абалынын начардыгынан жаан-чачын болгон убакта ал жолго суу толуп, көлчүк болуп калат. Азыркы тапта шаар тургундарына ыңгайлуу болсун деп көлчүккө убактылуу шагыл төктүк. Жакынкы арада жолду оңдоо иштерин жыйынтыктап, тротуарга асфальт төшөйбүз", - дейт жетекчи.

Эске салсак, "Ош шаарынын Масалиев көчөсүндөгү тротуар менен жаандан кийин баса албайсың, ал жер көлчүктөн арылбай койду" деген билдирүүсүн окурман "Соңку кабар" бөлүмүнүн "Элдик кабар" рубрикасына жөнөткөн.