Модель: "Гиннесстин рекорддор китебине" кирмейинче көкүрөгүмдү чоңойто берем"

Германиялык Мартина Биг - табиятынан европеид расасында төрөлгөн айым. Ал дүйнө коомчулугуна медицинанын жардамы менен кара терилүү моделге айланган жоругу менен белгилүү. Кыялында Барби куурчагына окшошкусу келип, актриса Памела Андерсонду кумир туткан Мартина жакында эле Африкага барып келген. Бул тууралуу батыш маалымат каражаттары жазып чыгышты.

"Кениялык курбуларымдын бири ошол жактагы дин кызматкерине менин кара терилүү айымга айланганымды айтыптыр. Андагы чиркөө кызматкери мени конокко чакырды. Ал жакка барганда мен баптизм динин кабыл алдым", - деп айткан ал.

Мартина - Европада эң чоң 32-өлчөмдөгү жасалма көкүрөктүн ээси. Ал көкүрөгүн чоңойтуу үчүн жумушунан кеткен. "Көкүрөгүмдү аябай чоңойткум келди, жок дегенде 2 килограммга чейин. Ошондо жетекчилик "жумушту же көкүрөгүңдү танда" деген талап койду. Мен максатыма жетүүнү кааладым", - деген ал.

Модель "Гиннесстин рекорддор китебине" төшү эң чоң айым катары тизмеге кирмейинче көкүрөгүн чоңойто бере турганын кошумчалаган.

Белгилей кетсек, моделдин жосунсуз жоруктары көкүрөк чоңойтуу менен эле бүтүп калган эмес. Алдыда жамбашын да операция жолу менен чоңойтуп, чыныгы африкалык кыздарга окшошкусу келерин белгилеген. Сүйүктүүсү Майкл анын мындай "эрдигин" колдоп, кеңешин берип, менеджери катары иштеп келет. Чоң көкүрөк моделге айрым учурда ыңгайсыздык да жаратат. Ал "учурда бут кийимимди өзүм тазалай албайм, анткени көкүрөгүмдүн чоңдугунан бутум көрүнбөйт" дейт.