Сузакта өзүн асып алган өспүрүмдүн өлүмүнө шектелген 3 милициянын бирин райондук сот актады

Жалал-Абад облусунун Сузак районунда өзүн асып алган өспүрүмдүн өлүмүнө шектелген 3 милициянын бирин райондук сот актады. Бул тууралуу SUPER.KG порталына Жогорку Соттун басма сөз кызматынан билдиришти.

Маалыматка ылайык, 14 жаштагы өспүрүмдүн өлүмүнө байланыштуу айыпталып жаткан 3 милиция кызматкеринин кылмыш иштери облустук сотко өткөрүлүп берилген.

"Сузак райондук соту тарабынан Ж.А. аттуу милиция кызматкеринин кылмыш иши далилденбегендиктен акталды. Ал эми С.М. жана Н.Б. 205-берененин 1-бөлүмү менен 200 миң сомдон айыпка тартылган. Бирок прокуратуранын сунушу жана баланын атасынын апелляциясы менен кылмыш иши Жалал-Абад облустук сотунун кароосуна жөнөтүлдү", - деп билдирди басма сөз кызматынан.

Белгилей кетсек, 2016-жылдын 23-октябрында Сузак районунун Сымкат айылында 2002-жылы туулган Шерзат Алимбеков асынып алган. Окуучу өлөр алдында кат жазып калтырып кеткен. Катта эч кандай уурулук кылбаганын, акчасын жоготкон адам түнкү саат 2де ээн жерде катуу сабагандыктан, кылмышты моюнуна алууга аргасыз болгонун айткан.