УКМК: "Ошто ортомчу ишканаларга мыйзамсыз 228 миллион сомдон ашык каражат которулган фактысы аныкталып, кылмыш иши козголду"

Ош облусунда ортомчу ишканаларга мыйзамсыз 228 миллион сомдон ашык каражат которулгандыгы аныкталды. Бул тууралуу Улуттук коопсуздук мамлекеттик комитетинен билдиришти.

Маалыматка ылайык, ыкчам-издөө иш-чараларынын жүрүшүндө Турак жай-жарандык курулуш департаментинин Ош облустук капиталдык курулуш башкармалыгында мамлекеттик сатып алууларды мыйзамсыз жүргүзүү жана келишим түзүү фактысы аныкталган.

"2017-жылы Ош облустук капиталдык курулуш башкармалыгы Кара-Суу районунун Ачы конушунда жана Араван районунун Кең-Сай конушунда объектилерди куруу иштерин жүргүзүүдө ачык соода жүргүзгөн эмес. "Мамлекеттик сатып алуулар жөнүндө" Кыргыз Республикасынын Мыйзамынын талаптарын бузуу менен бир катар келишимдерди түзүшкөн. Бул келишимдердин негизинде капиталдык курулуш башкармалыгынын кызмат адамдарына тиешеси бар ортомчу ишканаларга 228 миллион сомдон ашык каражат мыйзамсыз которулгандыгы аныкталды", - деп айтылат маалыматта.

Топтолгон материалдардын негизинде Ош облустук прокуратурасы 304-берененин 3-бөлүмү (кызматтык абалынан кыянаттык менен пайдалануу) жана 306-берененин 2-бөлүмү (Кыргыз Республикасынын кызыкчылыктарына каршы контракт түзүү, мамлекеттик сатып алууну жүзөгө ашыруу) менен кылмыш ишин козгогон. Учурда тергөө иштери жүрүп жатат.