11 жылдан бери баласын күткөн 83 жаштагы эне: "Өлдү деген кат келди, сөөгү келген жок. Катка ишенбей күтүп жүрөм"

Ош облусунун Араван районуна караштуу Гүлбар айылынын тургуну, 1979-жылдын 27-октябрында туулган Ариков Токторбай Кулиевич 2007-жылы жумушка орношуу максатында Бишкекке кеткен бойдон дайынсыз. Бул тууралуу анын небере келини Элзира Союзбек кызы SUPER.KG порталына кабарлады.

"Эң таң калычтуусу - 2015-жылы Токторбай Ариковду өлдү деген кара кагаз келген. Бирок анын кайда көмүлгөнүн билбейбиз", - деди Союзбек кызы.

Дайынсыз болуп жаткан Токторбай Ариковдун 83 жаштагы апасы Шакар Арикова аны өлдү деген катка ишенбейт.

"Айыл өкмөткө ошондой кагаз келген экен, мага алып келип беришти. Балам эмне болуп өлдү, кайсы жерде өлүп, кайда көмүлдү белгисиз. Сөөгүн өз көзүң менен көрбөсөң ишенбейт экенсиң, жазда күтөм, күздө күтөм, ар бир күнүм баламды күтүү менен өтөт. Жолго машина токтоп калса балам келди го деп чуркап чыгам, айтор мага келип калчудай боло берет. Ошол кара кагаз келгенден кийин Араван райондук сотунда иш каралган. Ага улуу кызым барып жүрдү, бирок кийин сот шаардыкка өттү. Ошол бойдон жыйынтык деле чыкпай калды", - деди Ариковдун апасы.

Союзбек кызынын айтымында, мындан 11 жыл мурун таекесин айылдаштарынын бири иш таап берем деп Бишкекке алып кеткен.

"Таекемдин кат сабаты жоюлган эмес болчу. Иш таап берем деп алып кеткен киши 4-5 кыргыз баланы кошуп Казакстанга кулчулукка таштап кеткен экен. Агамдын жанындагы шериктери качып, кайра кайтып келишкен. Таекемден болсо ошол бойдон дайын жок. Таенебиз үмүтүн үзбөй ушунча жыл күттү, жөн эле уулуңар өлүп калды дегендин өзү туура эмес. Ошол катты таенем жоготуп алыптыр, биз кат аркылуу издештирели дегенбиз. Таенем азыркы учурда ден соолугунун мүмкүнчүлүгү чектелген кызы менен чогуу турат, дагы бир уулу Орусияда. Биз эгер чын эле өлгөн болсо, эмне болуп өлгөнүн, сөөгү кайда коюлганын билгибиз келет. Тиешелүү тараптар таенеме баласынын чын дайынын иликтеп бериши керек", - дейт Союзбек кызы.