Базар-Коргондун базарындагы ишкер: "Рэкетчилер мени сабап, "Баткениңе кет" дешти"

Жалал-Абад облусунун Базар-Коргон районундагы борбордук базардын ишкери сабалды. Бул тууралуу бүгүн, 14-апрелде SUPER.KG порталына жабырлануучу, ишкер Чинара Гуламидинова билдирди.

Анын айтымында, базардын башчысы ага үстөмдүк кылып, акча талап кылып келген. "Акчаны берүүдөн баш тартсам, "Биз койгон эрежеге баш ийбесең, Баткениңе кет" деп ур-токмокко алышкан", - деди Гуламидинова.

Ишкер бул чыр 2013-жылдан бери уланып жатканын айтты.

"Жолдошум экөөбүз Баткен облусунан келип, бул жакта соода кылып иштейбиз. Дүкөндү мыйзам чегинде тиешелүү уруксат кагаздары менен сатып алгам. Бирок ошого карабастан келген күндөн тарта базар башчысы мыйзамсыз акча талап кылат. Хюндай Портер үлгүсүндөгү жүк ташуучу унаага 400 сом, ал эми Мерседес Спринтер үлгүсүндөгү унаага 500 сомдон берип келгем. Менин дүкөнүм Ж. аттуу базар башчынын аймагында жайгашкан. Анын рэкет менен алектенген балдары бар. Ошол балдар менден ар бир жүк ташуучу унаага акча алып кетишчү", - дейт жабырлануучу.

Мындан тышкары ал 5 жылга созулуп келе жаткан чыр 4-апрель күнү күчөгөнүн баса белгиледи. Бул күнү базарда иштеген сатуучулар дүкөнүнө кирип, ур-токмокко алып, жыйынтыгында сол колунан жаракат алганын айтат ишкер.

"Мыйзамсыз акча тапшыруудан баш тарткандан кийин ар кандай жалган жүйө менен мени куугунтуктай баштады. Мен буга чейин да райондук милицияга коркутуу тууралуу арыз менен кайрылгам. Ашып кетсе 5 айга чейин мага тийишпей калышат да, кайра эле куугунтуктоону башташат. 10 күн мурун, 4-апрелде сатуучулар кирип келип мени ур-токмокко алышкан", - деп кошумчалады Гуламидинова.

Жалал-Абад ОИИБинин басма сөз катчысы Самара Кыдырова ишкердин сабалуусу боюнча факты Базар-Коргон РИИБинде катталганын билдирди. Учурда соттук медициналык экспертиза дайындалып, анын жыйынтыгы менен укуктук баа берилерин айтышты милициядан.

SUPER.KG порталы экинчи тараптын пикирин угууга даяр.