Путин АКШнын Сирияга жасаган соккусу эмнеге жеткириши мүмкүн экенин айтты

Орусиянын президенти Владимир Путин БУУнун уставын бузуу менен Сирияга карата сокку эл аралык мамилелердеги башаламандыкка жеткириши мүмкүн экенин эскертти. Бул тууралуу ал Ирандын президенти Хасан Рухани менен телефон аркылуу сүйлөшкөндө айтканын орусиялык басылмалары жазып чыгышты.

"Сүйлөшүү иран тараптын сунушу менен өткөрүлдү. Эки өлкөнүн башчылары АКШнын жана анын тарапташ 2 өлкөнүн Сирияга карата жасаган соккусунан кийинки кырдаал жөнүндө сүйлөштү. Анда "Сириядагы саясий кырдаал жөнгө салынып жаткан учурда жасалган чабуул кайрадан чоң зыянга учуратып жатат" деп белгилешти президенттер", - деп айтылат маалыматта.

Ошондой эле Путин менен Рухани жакынкы чыгыш аймактарындагы кырдаалды, анын ичинде Йемендеги абалды талкууга алышты. Андан сырткары эки тарап келечектеги өз ара кызматташууну өнүктүрүүгө кызыкдар экенин билгилешти.

Эске салсак, 14-апрелде АКШнын президенти Дональд Трамп "Сириянын өкмөтү химиялык курал колдонду" деп Сириянын аймагына сокку урууга буйрук берген. АКШ, Улуу Британия жана Франция Сириянын аймагына карата ракеталык сокку урган. Сириянын башкы штабынын маалыматына ылайык, батыш коалициясы жарандык жана аскерий объектилерге 110 ракета чыгарган. Алардын көпчүлүгү атып түшүрүлүп, 3 жаран жабыр тартканы маалымдалган. Батыш коалициясынын соккусун Орусиянын президенти Владимир Путин "Террорчулук менен күрөшүп жаткан көз карандысыз өлкөгө карата баскынчылык аракети" деп баалаган. АКШнын президенти Дональд Трамп Сирияга карата батыш коалициясынын соккусун жогорку деңгээлде өттү деп баалаган.