Чүйдөгү 3 абакты жабуу сунушталды

Жазаларды аткаруу мамлекеттик кызматы Чүй облусундагы 3 абакты жабууну сунуштады. Тиешелүү токтом долбоору өкмөттүн расмий сайтында жарыяланды.

Маалыматка ылайык, Жазаларды аткаруу мамлекеттик кызматы Бишкектеги №35, Сокулуктун Новопавловка айылындагы №37 жана Аламүдүн районундагы №48-абактарды жоюуну коомдук талкууга койду.

"Бул 3 абактын 50 пайызы гана толгон. Ошондой эле бошотулган имараттарды башка мекемелердин карамагына өткөрүп берүү каралып жатат. Ал эми ичинде жаза өтөп жаткандарды башка абактарга которуу, ал жерде иштеген кызматкерлерди жазаларды аткаруу кызматынын башка абактарына жумушка орноштуруу каралган", - деп жазылат маалыматта.

Ошондой эле маалыматта, буга чейин Талас облусунун Кара-Буура районундагы №49-абакты жоюп, анын имаратын №39-абакка өткөрүп, кызматкерлерин башка мекемелерге жумушка орнотушкандыгы жазылат.