Орусияда көзү азиздер үчүн Чыңгыз Айтматовдун 90 жылдык кечеси өткөрүлөт

Орусиянын Санкт-Петербург шаарындагы мамлекеттик китепканада көзү азиздер үчүн жазуучу Чыңгыз Айтматовдун 90 жылдыгына арналган кече өткөрүлөт. Бул тууралуу бүгүн, 17-апрелде орус басылмалары жазып чыгышты.

Маалым болгондой, кече Санкт-Петербургдун мамлекеттик китепканасында 20-апрель күнү өткөрүлөт. Аталган кече Орусиянын аймагында уюштурулуп жаткан "Китепкана түнү" акциясынын алкагында уюштурулган.

"Кечеде улуу жазуучу Чыңгыз Айтматовдун басып өткөн жолу жана анын чыгармачылыгы тааныштырылат. Ошондой эле Кыргыз өлкөсүнүн маданияты жана салты көрүүчүлөргө тартууланат. Программанын биринчи бөлүгүндө жазуучунун чыгармаларынан кесипкөй окугучтар үзүндү окуп берет. Айрым үзүндүлөрдү көзү азиздер үчүн атайын аспаптын жардамы менен окушат", - деп жазылат маалыматта.

Мындан тышкары Кыргыз өлкөсүнүн маданияты, салты менен Кыргыз диаспоралары тааныштырат.