"Тогуз-Тородогу митингге активдүү катышкан деп кармалган аялдын 2 айлык баласы бар" дейт бир тууганы

"Камакта отурган аялдардын биринин 2 айлык кызы бар. Кызы эки күндөн бери ачка калууда", - дейт 17-апрелде митингге чыккан аялдын бир тууган иниси Адилет Көчкөнбай уулу.

Ал кармалган эжеси Сабыркан Мусалиева 40 жашта экенин айтты. "Анын 4 эркек уулу, бир кызы бар. Эжемди 15-апрель күнү кармап кетишкен. Тез арада бошотуу керек. Кызы ачка отурат", - дейт Адилет Көчкөнбай уулу.

Ички иштер министрлигинин басма сөз катчысы Бакыт Сеитов бул боюнча маалыматы жок экенин айтты. "Алардын балдары бар экенин же жок экенин билбейм, бул маалыматты ушул жерден уктум. Кармалгандын үчөөсү аял. Алардын эң жашы 18 жашта. Калгандары 20-30 жаштан өткөн. Учурда тергөө иштери жүрүп жатат. Кошумча маалыматты беребиз", - деди Сейитов.

17-апрелде Тогуз-Торо районунун 100дөн ашык тургуну Ак Үйдүн алдына митингге чыкты. Алар милиция тарабынан кармалып Бишкекке алып келинген район тургундарын бошотууну талап кылышууда.

Айта кетсек, буга чейин Тогуз-Тородо миңден ашуун адамдын катышуусунда митинг болгон. Алар аймактагы алтын ылгоочу комбинаттын курулушу токтотулуусун талап кылышкан. Митингдин жүрүшүндө алтын ылгоочу комбинаттын имараты өрттөлүп, ыргытылган таштан 3 милиция кызматкери жана жергиликтүү тургун жаракат алып ооруканага кайрылган. Кийин бул окуяга байланыштуу райондун акими кызматынан алынган.

Тогуз-Тородогу митингге активдүү катышкан 15 адам кармалган.