Бишкек ШИИББи: "Маршруттук таксилерде уурулук менен алектенген 2 адам кармалды, алар 15 факты боюнча айыпталып жатат"

Маршруттук таксилерде уурулук менен алектенген 2 адам кармалды. Бул тууралуу Бишкек ШИИББинин басма сөз кызматынан билдиришти.

Маалыматка ылайык, жаран 13-апрелде милицияга март айында күрмөсүнүн чөнтөгүндөгү 18 миң сом салынган капчыгын уурдап кетишкенин айтып, арыз менен кайрылган. Аталган факт боюнча 164-берене (уурулук) менен кылмыш иши козголгон. Ыкчам тергөө иштеринин жүрүшүндө шектүүлөрдүн өздүгү аныкталып, 18 жаштагы Т.А. менен 24 жаштагы Т.Д. кармалган. Алардын үйүн тинтүүгө алган учурда 1 сумка, 12 капчык ичиндеги 6 айдоочулук күбөлүк, 4 техникалык күбөлүк, 6 ишеним кат, 9 банк карточкасы, 3 уюлдук телефон, 3 сим-карта жана 1 бет кап алынган.

Колго түшкөндөрдүн жактоочусунун суранычы менен шектүүлөр СИЗО-1ге 2 айга камакка алынган. Мындан сырткары аларга 15 уурулук фактысы боюнча айып коюлуп, сегиз кылмыш иши ачылган.