УКМК: "Өзүн президенттик аппараттын жетекчилеринин биримин деп телефон чалуу аркылуу бийлик өкүлүн коркуткан жаран кармалды"

Өзүн президенттик аппарат жетекчилеринин биримин деп тааныштырып, Ысык-Көл облусунун ыйгарым укуктуу өкүлүн телефон чалуу аркылуу коркуткан жаран кармалды. Бул тууралуу Улуттук коопсуздук мамлекеттик комитетинин басма сөз кызматынан билдиришти.

Маалыматка ылайык, шектүү 16-апрелде кармалган.

"Кармалган адам 34 жаштагы Э.Д. аттуу жаран болгон. Ал 12-апрель күнү Ысык-Көл облусунун ыйгарым укуктуу өкүлүнө жана Ысык-Көл өнүктүрүү фондун башкаруу дирекциясынын директоруна телефон чалып, коркуткан. Анда Э.Д. бийлик өкүлүнүн атын жамынып, Ысык-Көл облусунун өнүктүрүү фондунун каражаттарын ыйгарып алуу фактысы боюнча кылмыш ишинин фигуранты болгон башкармалыктын мурдагы директорунун орун басарын кайрадан өз ордуна алып келүүнү талап кылган", - деп билдирет басма сөз кызматы.

Учурда УКМК бийлик өкүлдөрүнүн атынан ушундай шектүү телефондук чалуулардан жарандарды сак жана этият болууга, мындай учурда дароо укук коргоо органдарына кайрылууга чакырат.