Дарыгерлер кытайлык жарандын ичинен 20 жыл мурун жутуп алган от тутанткычты алып чыгышты

Кытайда дарыгерлер адамдын ичинен 20 жыл мурун жутуп алган от тутанткычты (зажигалка) алып чыгышты. Бул тууралуу жергиликтүү басылмалар жазышты.

Маалыматка ылайык, окуя Кытайдын Чэнду шаарында катталган. Операция учурунда кичинекей видео тартуучу камера атайын бейтаптын ичине салынып, анын жардамы менен от тутанткычтын кайсы жакта жайгашканын табышкан. Дарыгерлердин айтымында алар от тутанткычты экинчи аракеттен кийин гана алып чыга алышкан. Операция 10 мүнөткө созулган.

Бейтаптын айтымында, ал от тутанткычты мындан 20 жыл мурун кокусунан жутуп алган. Бирок эч жери оорубагандыктан дарыгерлерге кайрылган эмес. Акыркы күндөрү ичи ооруп, ажатканага барганда кыйналгандыктан ооруканага барууга аргасыз болгон. Ошондо гана дарыгерлер анын ичинде от тутанткыч бар экенин билишкен.