Кытайдын элчиси "Жогорку Кеңештеги биз тууралуу айтылган сындар бизди капа кылууда" деп айтканы белгилүү болду

Бүгүн, 17-апрелде Жогорку Кеңештеги "Республика-Ата Журт", "Ата Мекен", "Өнүгүү-Прогресс" оппозициялык фракциялары өкмөттүн 2017-жылдагы ишмердүүлүгү боюнча отчётун карап жатат.

Анын жүрүшүндө "Республика-Ата Журт" фракциясынын лидери Жыргалбек Турускулов өкмөттү сынга алды. Ал премьер-министр Сапар Исаковго кайрылып, өкмөт убадалаган иштерди толук аткара албаганын айтты. "Лиглас" деген алдамчы компанияга алданып калдыңыз, "Акылдуу шаар" долбооруңуз толук ишке ашпай жатат, "Мегакомду" да сата алган жоксуз, Бишкек ЖЭБи боюнча кол алдыңыздагы кызматкерлер алдашты, 386 миллион доллардын кайда кеткенин көзөмөлдөгөн жоксуз. Эртең аны биздин балдар төлөөгө мажбур болот", - деди Турускулов.

Сапар Исаков ага жооп кылып: "Сиз мени премьерликте 4-5 жылдан бери отурат деп ойлоп калдыңыз окшойт. Сиз мага 4-5 жылдык мөөнөттөгү иштер боюнча сын айттыңыз. "Акылдуу шаар" боюнча иш эми башталды, алдыда 2 жылдык мөөнөт бар, бизге убакыт бергиле.

ЖЭБ боюнча териштирүү иштери бүтсүн, азырынча катуу айтпай турсак. Кытайдын элчиси биздин тышкы иштер министрине келип, "Жогорку Кеңеште биз тууралуу сындар айтылып жатыптыр, бизди капа кылып жатасыңар" деп айтыптыр. Бул боюнча Эрлан Абдылдаев тастыктап берет", - деди Исаков.