"ЭЛДИК КАБАРга" жооп: Курулуш башкармалыгы: "Канализация түтүктөрү орнотулган соң курулуш ченемдери сакталбагандыктан тротуарлар жарактан чыккан"

Канализация түтүктөрү орнотулган соң курулуш ченемдери сакталбагандыктан тротуарлар жарактан чыккан. Бул тууралуу SUPER.KG порталына Бишкек шаардык мэриясынын капиталдык курулуш башкармалыгынан билдиришти.

"Бишкек шаарынын Арча-Бешик конушунда жайгашкан Даркүл Күйүкова көчөсүндө эч кандай уруксатсыз канализация түтүктөрү орнотулган. Күз айларында аталган жерде жолдорду оңдоо иштери жүрүп жаңы тротуарлар салынган. Бирок көп убакыт өтпөй тротуарлар жарактан чыккан. Алардын жарактан чыгышынын себеби түтүктөр орнотулган соң ал жерлерде курулуш ченемдер сакталбай, шагыл тыгыздалбастан кайра көмүлгөн. Ошол себептен ал жердеги жерлер чөгүп кеткен", - дейт башкармалык.

Учурда тротуарды кайрадан оңдоо үчүн тургундар менен сүйлөшүүлөр жүргүзүлүп жатканын башкармалык кошумчалады.

Эскерте кетсек, "Бишкектеги Арча-Бешик конушундагы тротуар жыл өтпөй жарактан чыкты" деген билдирүүсүн окурман "Соңку кабар" бөлүмүнүн "Элдик кабар" рубрикасына жөнөткөн.