Момбеков өкмөткө: "Дыйкандын талабын аткарасыңарбы же байлардын талабын аткарасыңарбы?"

"Ош базарында" үч жолу өрт болду, эч ким кызматтан кеткен жок", - деп бүгүн, 18-апрелдеги Жогорку Кеңештин жыйынында депутат Рыскелди Момбеков билдирди. Ал өрт кырсыгына байланыштуу жоопкер тараптар болбой жатканына тынчсызданды.

"Кырсыктын алдын ала турган өкмөт бар. Силер өкмөт өрт чыкканга чейин мактанасыңар, өрт чыккандан кийин актанасыңар. Алдын алганга эмес, артын алганга өнөкөт таап алгансыңар.

"Ош базарында" үч жолу өрт болду. Эгер өрт андан ары кеткенде эмне болот эле? "Ош базарынын" жанында мунай куюучу жай бар. Андан ары эки мунай базасы бар. Алар өрттөнгөндө Бишкектин жарымы күймөк да. Эмне үчүн мунай базаларын көчүргөн жоксуңар? Ал эки база өлкөдөгү эң бай эки адамдыкы. Силер дыйкандын талабын аткарасыңарбы же байлардын талабын аткарасыңарбы? Прокуратура алардын жабылышы боюнча чечим чыгарган. Бирок жабылбай эле иштеп жатпайбы. Силер эмне кылып отурасыңар?

Кемероводо өрт болду, облустун губернатору Аман Тулеев кызматтан кетти. Тогуз-Тородо өрт болду, аким кетти. Бул жерде үч жолу өрт чыкты, бир адам кызматтан кеткен жок. Экотехинспекциянын жетекчилигин, Ленин районунун акимин, керек болсо, мэрдин орун басарларын кетириш керек. Эл жабыр тартып жатпайбы? Силер бул жерге келип, мынча жер өрттөндү, мынча жабыр тартты деп отурасыңар. Бул да кырсык, башка жабыркагандарга жардам көрсөткөндөй эле буларга да жардам берилиши керек", - деди Момбеков.