Бишкек шаарына бир даанасы 9 миң сомдук көчөттөр отургузулду

Шаар ичин жашылдандыруу максатында Бишкек шаарынын "Жашылдандыруу" ишканасы бир даанасы 9 миң сомдук көчөттөрдү сатып алды. Бул тууралуу "Жашылдандыруу" мекемесинин агроному Элнура Жолдошева билдирди.

"Бүгүнкү күндө шаар ичине 10 миң 768 даана көчөт отургузулган. Мындан сырткары, 2017-жылы күзүндө Муниципалдык аймактык башкаруу мекемеси алып берген 2598 даана көчөт тигилген", - дейт ал.

Ал эми коомчулук 9 миң сомго бир даана көчөт сатып алуу кымбат экенин айтып, нааразычылыгын билдирген. Мындай талкууга Алымжан Усубакунов: "Көчөттөрдү алганга чейин бааларга мониторинг жүргүзүлүп, биздин токой чарбаларда түрдүү дарактар бар экени аныкталган. Бирок алардын диаметри 3-4 сантиметр, бийиктиги 2-2,5 метрди түзгөн жаш көчөттөр экен. Алардын өсүшү үчүн 7-8 жыл керек. Бул убакыт аралыгында алардын тамыр алып, өсүп кетишине кепилдик жок. Биз учурда экология көйгөйүн чечүүнүн үстүндө иштеп жатабыз", - деген пикирин айткан.

Ошондой эле Алымжан Усубакунов бардык көчөттөр биздин климатка ылайыкташып сатып алынганын белгилеген.

"Жашылдандыруу" ишканасы чет өлкөдөн 13 миллион 763 миң сомго көчөттүн алты түрүн сатып алган. Алар:

Майда жалбырактуу липа - 3 636 000 сомго 400 даана көчөт (бир даанасы 9 090 сом);

Зараң - 2 727 000 сомго 300 даана көчөт (бир даанасы 9 090 сом);

Каштан - 1 818 000 сомго 200 даана көчөт (бир даанасы 9 090 сом);

Чынар терек - 3 636 000 сомго 400 даана көчөт (бир даанасы 9 090 сом);

Декоративдик алма багы - 485 000 сомго 100 даана көчөт (бир даанасы 4 850 сом);

Четин - 1 461 000 сомго 300 даана көчөт (бир даанасы 4 870 сом).