Чүйдө газ ташыган унаа алдыдагы эки унаадан ашып өтөм деп оодарылып кетти

Чүй облусунун Жайыл районуна жакын жерде күйүүчү май жана жүк ташыган унаалардан ашып өтөм деп газ ташыган унаа оодарылып кетти. Бул тууралуу Өзгөчө кырдаалдар министрлигинин басма сөз кызматынан билдиришти.

Маалыматка ылайык, жол кырсыгы бүгүн, 18-апрелде саат 11:00 чамасында Бишкек-Ош унаа жолунун 121-чакырымында болгон. Анда газ ташыган унаа алдыдагы унаалардан ашуу максатында каршы тилкеге чыккан. Бирок ал оор жүк ташуучу унааны ашып баратып капталы менен урунган. Жыйынтыгында газ ташуучу унаанын цистернасы жолдун боюна оодарылып калган.

"Оодарылган цистернадан газ чыккан эмес. Бирок кулап калган цистернаны көтөрүүгө крандын күчү жетпейт, ошол себептен цистернанын ичиндеги жаратылыш газын башка унаага куюп алышты. Куюу учурунда өрт коопсуздугун сактоо максатында ӨКМнын Жайыл райондук өрткө каршы кызматы тартылды", - деп айтылат маалыматта.