Москвада Кыргыз жараны бычакталып өлтүрүлдү деген маалымат калп болуп чыкты. Жалганчылар жоопко тартылат

Москвада Кыргыз жараны бычакталып өлтүрүлдү деген маалымат калп болуп чыкты. Жалганчылар жоопко тартылышы мүмкүн. Бул тууралуу SUPER.KG порталына Кыргыз Республикасынын Орусиядагы элчилигинен билдиришти.

"Биз тактоо үчүн бардык тийиштүү органдар менен байланыштык. Бирок бардыгы бул факты катталбаганын билдиришти. Азыр биздин юрист тактоо иштерин жүргүзүп жатат. Эгер бул фотошоп аркылуу жасалган тамаша болсо, уюштурган тарап жоопко тартылышы мүмкүн. Себеби чет өлкөдө жүргөн мекендештерибизге бул терс таасирин тийгизет", - дешти элчиликтен.

Эске салсак, буга чейин Орусияда Кыргыз жаранын "Домодедово" аэропортуна бараткан жолдо бычактап кетишти деген маалыматты окурман "Элдик кабарга" билдирген. SUPER.KG порталы бул боюнча Кыргыз Республикасынын Орусиядагы элчилигине байланышканда, мындай кабар бул дипломатиялык мекемеге да келгенин билдиришкен.