Арменияда экс-президент премьер-министр болуп шайланды. Ага каршы нааразычылык акциялары уланууда

Арменияда экс-президент Серж Саргсян премьер-министр болуп шайланды. Ага каршы нааразычылык акциялары уланууда. Бул тууралуу чет элдик басылмалар жазышты.

Маалыматтарга ылайык, кечээ, 18-апрелде митингге катышып жаткан 60тан ашуун адамды полиция кармаган. "Экс-президенттин өкмөт башчылыгына келишине нааразы болгондордун акциялары бир жумадан бери уланууда. Буга карабастан Армения парламенти Серж Саргсянды 17-апрелде өкмөт башчысы кызматына бекиткен. Добуш берүүдө парламенттин 76 депутат аны колдоп, 17 парламентарий каршы добуш берген. Армениянын парламенти 105 депутаттан турат", - деп жазышат басылмалар.

Нааразычылык акцияларына миңдеген адамдар катышып жатканы маалымдалууда. "Митингдердин уюштуруучусу оппозициячыл депутат Никол Пашинян Арменияда революциялык кырдаал түзүлгөнүн, тынч мүнөздөгү “баркыт ыңкылабы" башталганын жарыялаган. Митингчилер өкмөттүк имараттарды курчоого алып, мамлекеттик мекемелердеги жумуштарды токтотушту", - деп айтылат маалыматтарда.

Айта кетсек, Арменияда 2015-жылы өзгөртүлгөн Конституцияга ылайык, өлкө жарым-жартылай президенттик башкаруудан парламенттик башкарууга өтүп, премьер-министрдин ыйгарым укуктары күчөтүлүп, өлкөдөгү биринчи кишиге айланган. Өлкөнүн парламенти шайлаган президент Армен Саркисян 9-апрелде кызматка киришкен.