Селсаяктарга тиш жуучу паста жедирген блоггер кескин сынга кабылды

Жаш блоггер Канхуа Рендин "ReSet" аталыштагы YouTube каналына 1 миллион 200 миңден ашык колдонуучу катталган. Рен өзүнүн көңүлүн көтөрүп ошону менен бирге эле акча табууну көздөп, видеоролик тартууну чечкен. Бирок ошол видеоролик үчүн ал эркинен ажыроо алдында турганын чет элдик маалымат каражаттары жазып чыгышты.

Белгилүү болгондой, Канхуа печеньенин ортосундагы кремдин ордуна тиш жуучу пастаны сыгып, андан соң ал тиш жуучу паста коюлган печеньелерди көчөдөгү селсаяктарга тараткан. Бул окуянын баарын ал видеого тартып өзүнүн каналына жарыялаган. Бирок көптөгөн интернет колдонуучулар блоггерди сынга алып, ал жардамга муктаж адамдарды шылдыңдаганын айтып чыгышкан.

Рен өзүнүн видеосун өчүрүп, ага тартылып калган 52 жаштагы селсаякка унчукпоосу үчүн 400 доллар акча сунуштаган.

"Мен бир аз аша чаап кеткеним чын. Бирок бир четинен алып караганда селсаякка тишин тазалап алганга жардам бердим да", - деп билдирген Рен.

Азыркы тапта полиция бул иш боюнча иликтөө иштерин жүргүзүп жатат. Алдын ала маалыматтар боюнча ал 2 жылга эркинен ажыратылып жана 40 миң доллар өлчөмүндөгү айып төлөөсү мүмкүн.