Британиялык 22 жаштагы кыз жигитин 9 ай бою үйүндө камап, зордук-зомбулук көрсөткөнү үчүн 7,5 жылга эркинен ажыратылды

Британиялык 22 жаштагы Жордан Ворт жигитин 9 ай бою үйүндө камап, зордук-зомбулук көрсөтүп жүргөнү үчүн 7,5 жылга эркинен ажыратылды. Бул тууралуу чет элдик басылмалар жазып чыгышты.

Маалым болгондой, мындай көрүнүш аталган өлкөдө биринчи жолу кездешкен.

Жордан Вортту сырттан тааныгандар абдан мээримдүү, камкор адам катары сыпатташат. Ал колледжди аяктаган соң, мугалим болуп эмгектенүүнү каалачу. Бирок Лутон шаардык соту аны 9 ай бою жигити Алекс Скилди үйүнө камап, ага кол көтөрүп жүргөндүгү үчүн 7,5 жылга эркинен ажыраткан.

Алекс Скил гидроцефалия (мээге суюктук толуп калгандыгына байланыштуу өрчүүсү начарлоо) оорусу менен жабыркайт. Түгөйлөр 2012-жылы экөө тең 16 жаш курагында сүйлөшүп баштап, көп өтпөй бирге жашоону чечишкен. Бирок Скилдин ар бир кыймыл-аракетин сүйлөшкөн кызы башкарып турган. Тактап айтканда, Ворт жигитине керебетке жатууга уруксат бербестен, полго жаткырган. Социалдык тармактардагы баракчаларын көзөмөлгө алып, кандай кийинүү керектигине чейин үйрөтүп турган. Кийинчерээк ага кол көтөрүп, ачуусу келгенде кайнак суу чачып жиберген учурлары да катталган. Жыйынтыгында жигиттин денесинин көпчүлүк бөлүгүндө күйүктөн калган тактар пайда болуп, колу-буту ар дайым көгөрүп жүргөн. Ал гана эмес 63,5 килограмм салмактан 44 килограммга чейин арыктап кеткен.

Окуя тууралуу полиция кызматкерлерине кыз-жигиттин кошуналары кабарлашкан. Алар Алекс Скилдин колу-буту көгөрүп, жерде онтоп жатканын көрүп калышкан.

Соттун жыйынтыгы боюнча Жордан Ворт 7,5 жылга эркинен ажыратылып, өмүр бою Алекс Скилдин жанына жолобошу керек. Ошондой эле Британия соту мындай көрүнүш аталган өлкөдө биринчи жолу кездешип жатканын, буга чейин кыз тарабынан эмес, эркек тарабынан зордук-зомбулук көргөндөр кайрылып келишкенин баса белгилешкен.