Бишкекте жигиттер "Токтот, кызыңды кордотконуңду!" деген ураан менен жүрүшкө чыгышты

Бүгүн, 20-апрелде Бишкек шаарында эркектер кыргыз кыздарынын чет өлкөгө чыгуусуна каршы болуп жүрүшкө чыгышты. Ага жалпы кыркка чукул активисттер катышты. Алар Фрунзе-Орозбеков көчөлөрүнүн кесилишинде топтолуп, плакаттарды көтөрүп Абдрахманов көчөсүнө чейин басышты.

Уюштуруучулардын айтымында, кыргыздын кыздары чет өлкөгө кетип, бир топ кордуктарга, зомбулукка жана башка ар түрдүү кыйынчылыктарга туш болууда.

Жарандык активист Тилек Таалайбеков жүрүштүн негизги максаттары тууралуу айтып берди. Алар:

1. Жаш кыздардын чет элге иштеш үчүн чыгуусун токтотуу;

2. Чыкса, атасы же энеси, күйөөсү, тууганы менен кошо кетүүсүн кароо;

3. Кыргыз жеринде ажырашкан эркектерге айып салуу, алименттин суммасын көтөрүү жана аны кечиктирүүсүз милдеттүү түрдө төлөтүү.

"26 жашка чейинки кыздардын чет өлкөлөргө кетүүсүнө чектөө киргизип берүүсүн суранат элек. Анткени канчалаган кыздарыбыз чет өлкөгө кетип, ал жактан ар түрдүү кордуктарга туш болууда. Ошондой эле чет өлкөдөгү кыздардын укуктарын коргосок дейбиз. Азыр кыздарыбыз мектепти бүтүп эле башка өлкөлөргө кетип жатышат.

Тил билбесе, турмуштун оош-кыйышын көрбөсө ал бат эле алданып, өз укугун билбей кор болот. Кыздар 26 жашка чейин мектепти, университетти бүтүп анан чыга берсин. Чет өлкөдө окуусун улантууга кетем дегендерге чектөө койбойбуз. Биз, тескеринче, аларды колдойбуз. Бирок ал окуу жайлар тастыкталып, текшерилип жөнөтүлгөн болсо", - деп айтты Таалайбеков.

Андан сырткары Таалайбеков мындай жагдай эмнеден улам пайда болуп жатканын айтып берди.

"Бул маселе өлкөбүздө жумуштун жоктугунан деп айтабыз, бирок Кыргыз жергесинде тигүү өндүрүшү азыр жакшы эле иштеп келе жатат. Ал ишканаларда деле чет өлкөдөгү 30-40 миң сомду тапса болот. Андан тышкары, чет өлкөдө жүргөндөр эс алып жаткан учурда түшкөн сүрөттөрүн социалдык тармакта жарыялаган үчүн биздин жаштар азгырылып, "ал жакта жашоо сонун, көп акча тапса болот экен" деп жаман жагдайларга кездешип жатышат. Ошондой эле өкмөтүбүз Кыргыз жергесинде чет өлкөдөн жумуш таап берген фирмаларды текшерип, аларды көзөмөлдөсө жакшы болмок. Анткени ал фирмалар кыздарды алдап, сатып жибергендер бар", - деди жүрүштү уюштургандардын бири Таалайбеков.

Бүгүн жүрүшкө топтолгондор талаптарын иреттеп жазып, бир пикирге келишип, аны сунуш катары бийлик өкүлдөрүнө жөнөтмөй болушту.