Кыргыз өлкөсүндө Улуу Ата Мекендик согуштун 475 катышуучусу бар

Кыргыз өлкөсүндө Улуу Ата Мекендик согуштун 475 катышуучусу бар. Бул тууралуу Эмгек жана социалдык өнүктүрүү министрлигинин басма сөз кызматы билдирди.

Белгилүү болгондой, азыркы тапта Кыргыз өлкөсүнүн аймагында Улуу Ата Мекендик согуштун 475 катышуучусу жашайт. Алардын ичинен 128и ден соолугунун мүмкүнчүлүгү чектелген адам, 299у согуштун катышуучусу, 23ү жашы жете элек мезгилде концлагерлерде кармалганы болсо, 25и Ленинград шаарында блокадада болгондор.

Маалыматка ылайык, Улуу Ата Мекендик согуштун катышуучуларына ай сайын жана жыл сайын республикалык бюджеттен атайын жөлөк пул төлөнөт. Алар айына 17 миң сом акча алышат, анын ичинен жеңилдиктердин ордуна берилген 7 миң сом жана өмүрүнүн аягына чейин аларга төлөнө турчу 10 миң сом стипендия. Ошону менен бирге эле ардагерлер айына 7 миң сом өлчөмүндөгү пенсия алышат.

Мындан сырткары ардагерлер жыл сайын 9-Май Жеңиш күнүн белгилөөнүн алкагында 15 миң сом өлчөмүндөгү акчалай төлөм алышат. Ал эми каза болгон ардагерлердин жубайларына, тылда эмгектенгендерге 10 миң сом өлчөмүндөгү акча төлөнөт.