Бишкекте 18 жаштагы 2 кыз опузалоо жолу менен башка кыздан 75 миң сом талап кылган деп шектелип кармалды

Бишкекте 18 жаштагы 2 кыз опузалоо жолу менен башка кыздан 75 миң сом талап кылган. Бул тууралуу Бишкек ШИИББинин басма сөз кызматынан билдиришти.

Маалыматка ылайык, 20-апрелде милицияга борбор калаанын жашоочуусу андан опузалоо жолу менен 75 миң сом талап кылган адамдарга карата чара көрүү боюнча арызы менен кайрылган.

"Ыкчам тергөө иштеринин жүрүшүндө, атайын боёк менен белгиленген 10 миң сом менен шектүү катары Ц.Е. жана Д.Э. аттуу эки кыз кармалган. Белгилүү болгондой кылмышка шектүү кыздар арыз ээсинин жеке маалыматтарына ээ болуп алып, аны интернетке жайылтам деп опузалоо жолу менен акча талап кылышкан", - деп айтылат маалыматта.

Аталган факт боюнча 170-берене (опузалоо) менен кылмыш иши козголгон. Шектүүлөр убактылуу жайга киргизилип, тергөө иштери жүрүп жатканы айтылат маалыматта.