Прокурордун унаасын жардырууга айыпталып жаткан адам 21 жылга эркинен ажыратылды

Башкы прокуратуранын кызматкеринин унаасын жардырууга шектелген адам 21 жылга эркинен ажыратылды. Бул тууралуу Жогорку Соттун басма сөз кызматынан билдиришти.

Маалыматка ылайык, Башкы прокуратуранын ички иликтөөлөр бөлүмүнүн кызматкери Эркин Курманалиевдин унаасын жардырган деп айыпталып кармалган 38 жаштагы А.Т. аттуу адамдын ишин 20-апрелде Октябрь райондук соту карап, өкүм чыгарган. Ага ылайык, анын мүлкү конфискацияланып, 21 жылга эркинен ажыратылып, жазасын күчөтүлгөн тартиптеги абакта өтөйт.

Айта кетсек, окуя 2016-жылдын 29-июль күнү эртең менен саат 08:45тер чамасында Бишкектин четиндеги Орто-Сай айылында болгон. Анда Башкы прокуратуранын ички иликтөөлөр бөлүмүнүн кызматкери Эркин Курманалиев унаасынын эшигин ачкан кезде жарылуу болгон. Анын кесепетинен унаа ээси оң көзүнөн жана сол колунан жабыркаган. Кылмышка шектүү катары 38 жаштагы А.Т. аттуу жаран кармалган.