"Сулайман-Тоо" музей-комплексинин жетекчиси кызматтан кетти

"Сулайман-Тоо" тарыхый-археологиялык музей-комплексинин жетекчиси Абдыкайым Кангелдиев кызматынан кетти. Бул тууралуу SUPER.KG порталына Маданият, маалымат жана туризм министрлигинин басма сөз катчысы билдирди.

Маалым болгондой, жетекчи кызматтан өз каалоосу менен кетүү боюнча арыз жазып, ал 19-апрель күнү канааттандырылган.

"Абдыкайым Кангелдиев өз каалоосу менен кызматтан кетти. Учурда анын ордуна ким жетекчи болуп дайындала турганы белгисиз. Талапкерлердин тизмеси да аныктала элек", - деди басма сөз катчы.

Белгилей кетсек, буга чейин аталган музейдин кызматкерлери SUPER.KG`ге жетекчиликтин жүргүзүп жаткан реформасына канааттанбай, кайрымдуулуктан чогулган каражаттарды максатсыз пайдаланып, мекемедеги кызматкерлердин моралдык укугун тебелеп жатканын билдиришкен.