Чемпиондор Лигасы: Жарым финалдын башкы каарманы - Мохаммад Салах

Бүгүн УЕФА Чемпиондор Лигасынын жарым финалдык беттештин алгачкы оюну өтөт. Анда Ливерпуль шаарында жергиликтүү команда италиялык “Романы” кабыл алат. Кызыктуу беттештин жыйынтыгы кандай боло турганын көпчүлүк күйөрмандар чыдамсыздык менен күтүп жаткан чагы.

“Энфилдде” кезектеги рок-н-ролл күтүлөт

Быйылкы сезондун башында "Ливерпулдун" дымагы ушунча болорун эч ким баамдаган эмес. Олку-солку ойногон Клопптун шакирттери бир күнү шумдук оюн көргөзсө, эртеси анчейин күчтүү эмес командага уттуруп койчу. "Ливерпуль" бул адаттан сезондун жүрүшүндө арыла баштады. "Кызылдардын" чабуулду гана ойлоп, кээде коргонууну таптакыр унутуп койгон сапаты бар. Бирок чабуулда Салах-Фирмино-Мане сыяктуу үчилтик турганда күйөрмандар ар бир оюнда бир нече голду күтүп калышат. Ылдамдык, чабуул жана дагы бир жолу чабуул. Футбол билермандары бекеринен "Ливерпулдун" оюнун рок-н-ролл концерти менен салыштырышкан жок. Юрген Клопп эми "Ливерпуль" үчүн идеалдуу оюнду тапкандай. Бул үчүн сол буттуу сыйкырчы керек эле. Сыйкырчы табылды. Ал Мохаммад Салах. Англия Премьер-Лигасынын 35 оюнунда 31 жолу айырмаланган египеттик футболчу аталган лиганын мыкты оюнчусу аталды. Анын "Алтын топ" үчүн күрөштө экендигин эч ким тана албайт. Жарым финалдык беттештин дагы бир кызыгы - Салах дал ушул "Ромадан" келгендигинде. "Ливерпулдун" чабуулуна "Ситинин" коргонуусу кеп болгон эмес, эми кезек "Романын" коргонуусу. "Энфилдде" голдор күтүлөт. Клопп, Салах жана рок-н-ролл.

Рим эрдиктен тажабайт

"Ливерпуль" мыкты чабуулуна ишенсе, "Рома" өзүнө ишенет. "Барселонаны" тизе бүктүртүп жаткандан кийин эми бул команда эч кимден коркпойт. "Рома" машыктыруучусу Эусебио Ди Франческо тактика чебери, андыктан бул оюнга камдап койгон көзүрлөрү жок эмес. "Ооба, Салах эми бизде ойнобойт. Бирок өзүбүздө Чыңгыз Ундер бар" деп оюн алдында машыктыруучу ой бөлүштү. Чындыгында курамы боюнча "Рома" "Ливерпулдан" кем калышпайт. Жеко жана Ундер өз оюнун таап кетсе, үй ээлеринин коргоочуларына кыйынчылык түшөт. Салах "Романы" билет. Ошол эле учурда "Рома" дагы Салахтын кандай ойноорун жакшы билет. Демек, Рим кантип коргонуу керектигин жакшы түшүнөт. Эрдик жасоо үчүн дароо чабуулга өтүп кетүү керек эмес.