Баш прокурорлукка талапкер Өткүрбек Жамшитов кандай байлыгы, канча үйү бар экенин айтты

24-апрелде Жогорку Кеңештин Укук тартиби, кылмыштуулук менен күрөшүү боюнча комитети башкы прокурорлукка Өткүрбек Жамшитовдун талапкерлигин карады.

Анда комитет төрагасы Мирлан Жээнчороев анын байлыгы, үйлөрү, бизнесте жүргөн жакын тууган уруктары боюнча маалымат сурады. “Бизде өткөн тарыхка карасак, жөө келип эбегейсиз байлык топтоп, жол тандабас минип чыгып кеткен башкы прокурорлор болду. Сиз азыр өзүңүздүн байлыгыңыз, жакындарыңызга жазылган бизнестер болсо, ачык айтып койсоңуз”, - деди Жээнчороев.

Өткүрбек Жамшитов өз байлыктарын санап берди. “Эки жыл мурун Бишкек шаарынан ипотекага 2 бөлмөлүү батир алгам. Азыр да аны төлөп бүтө элекмин, учурда кредит төлөп жатам. Мындан тышкары Ош облусунда өзүм туулган айылда ата-энем жашаган үй бар. Алардын баары декларациямда көрсөтүлгөн. Туугандарымдын эч биринде бизнес жок”, - деп жооп берди Жамшитов.

Талкуунун жыйынтыгында аталган комитет Өткүрбек Жамшитовдун талапкерлигин бир добуштан колдоду. Буга чейин парламенттин Конституциялык мыйзамдар, мамлекеттик түзүлүш, сот-укуктук маселелер жана Жогорку Кеңештин Регламенти боюнча комитети жана коалициялык көпчүлүк анын талапкерлигин бир добуштан колдогон.

Өмүр баяны:

Жамшитов Өткүрбек Асилбекович 1975-жылы 4-сентябрда Ош облусунун Кара-Суу районундагы Төлөйкөн айылында туулган. Жогорку билимдүү, 1996-жылы Кыргыз улуттук университетин юриспруденция адистиги боюнча бүтүргөн.

Үй-бүлөлүү, 3 баланын атасы.

Эмгек жолу:

1997-1998-жылдары - Талас шаардык прокуратурасында прокурордун жардамчысы;

1999-2002-жылдары - Талас шаарынын прокуратурасында тергөөчү;

2002-2005-жылдары - Талас облусунун Бакай-Ата районунун прокуратурасында тергөөчү;

2005-2006-жылдары - Ош облусунун Алай районунун прокуратурасында тергөөчү;

2006-2008-жылдары - Ош облусунун прокуратурасында тергөөчү;

2008-2011-жылдары - Баткен облусунун Кадамжай райондук прокуратурасында прокурордун орун басары;

2011-2015-жылдары - Баткен облусунун Лейлек районунун прокуратурасында прокурор;

2015-2018-жылдары - Жалал-Абад облусунун прокуратурасында прокурор.