Ошто гемофилия менен ооруган 19 жаштагы жаранды милиция кызматкерлери ур-токмокко алган деп шектелүүдө

Бүгүн, 24-апрелде гемофилия менен ооруган 19 жаштагы жаранды кармоо учурунда кыйноого алган деген шек менен Ош ШИИБинин кызматкерлерине кылмыш иши козголду. Бул тууралуу Адам укуктары боюнча "Эдвокаси" борборунан билдиришти.

Маалыматка ылайык, 19-апрелде Ош шаарынын прокуратурасы Кылмыш-жаза кодексинин 305-беренесинин 1-бөлүмү (кызматтык ыйгарым укуктардан аша чабуу) жана 305-беренесинин 2-бөлүмү (кыйноо) менен Ош ШИИБинин кызматкерлерине карата кылмыш ишин козгогон. Учурда тийиштүү документтер УКМКнын Ош шаары жана Ош облусу боюнча бөлүмүнө өткөрүлүп берилди.

"4-апрелде Ош ШИИБинин кызматкерлери тарабынан М.Т. аттуу 19 жаштагы Баткен облусунун Кызыл-Кыя шаарынын тургуну телефон уурдаган деп шектүү катары кармалган. Алгачкы сурак жүргүзүүдөн кийин М.Т. убактылуу кармоочу жайга киргизилип, кийин Ош шаарындагы №5-СИЗОго которулган. Ал эми шектүү тубаса генетикалык оору - гемофилия (кандын уюусунун жетишсиздигинен болгон кан токтобогондук) менен жапа чегип келген. СИЗОнун дарыгерлеринин айтуусунда шектүү камакта болгон 2 күн аралыгында дене табы көтөрүлүп кеткен. Тийиштүү жардам көрсөтүү үчүн "Тез жардам" унаасы чакыртылып, дарыгерлер жаранды Ош облустук ооруканасынын жандандыруу бөлүмүнө жаткырган. Тийиштүү дарылоодон өткөрүлүп, бир суткада өзүнө келген", - деп айтылат маалыматта.

Ошондой эле жаран убактылуу кармоочу жайга киргизилгенде денесинен эч кандай жаракаттар табылган эмес. Бирок №5-СИЗОго түшкөндө баш мээсинен оор жаракат алганы белгилүү болгону айтылат. Мындан улам бардык документтер прокуратурага өткөрүлүп берилген. Прокуратура таанышып чыккан соң Ош ШИИБинин кызматкерлерине карата кылмыш ишин козгогон.

Ал эми уурдалган телефон ээсине кайтарылып берилип, шектүүгө карата тосмо арыз жазылып, тараптар бирин-бири кечирген. 23-апрелде М.Т. оорукандан дарылануусун жыйынтыктап, боштондукка чыкканы айтылат.