Чемпиондор Лигасы: "Ливерпуль" өз талаасында "Романы" утуп алды

25-апрелге караган түнү Чемпиондор Лигасынын алгачкы жарым финалдык беттеши орун алды. Анда англиялык "Ливерпуль" өз талаасында италиялык "Романы" кабыл алды.

Энфилд стадионунда орун алган беттеш 5:2 эсебинде "Ливерпулдун" жеңиши менен аяктады. Оюндун жүрүшүндө "Ливерпуль" командасынан үчилтиги Салах-Фермино-Мане айырмаланышты.

Беттештин 36-мүнөтүндө англиялык клубдун жылдызы Мохамед Салах алыскы бурчка багыттаган соккусу таамай болуп эсеп санын ачты. 1-таймдын кошумча убактысында Мохамед Салах кайрадан айырмаланды, ал Ферминонун чыгарып берүүсүнө жетишип, дарбазачы менен бетме-бет келди. Салах Алисондун дарбазадан чыгып кеткенин байкап, топту анын үстүнөн ашырып эсепти 2:0 кылды. 56-мүнөттө Садио Мане айырмаланып эсепти 3:0 кылса, Роберто Фермино 61 жана 69-мүнөттө айырмаланып эсепти 5:0гө айлантты. Буга "Рома" командасы 81-мүнөттө Эдин Жеконун голу менен жооп кайтарса, 85-мүнөттө Диего Перотти пенальтиден гол киргизип, эсепти 5:2 кылды.

Муну менен "Рома" командасы жооптук беттеште жеңишти илип кетүүгө мүмкүнчүлүктөрүн сактады. Ал эми "Ливерпуль" финалга аттанууга 1 кадам жакындады. Командалардын жооптук беттеши 3-майга караган түнү орун алат.

Эскерте кетсек, бүгүн, 25-апрелде Мюнхен шаарында "Бавария" командасы мадриддик "Реалды" кабыл алат. Беттеш "Альянц-Арена" стадионунда орун алып, Бишкек убактысы боюнча саат 00:45те башталат.